原來呢個【宅語學】專欄都丟低好耐無開過，之前都係寫咗兩篇(咩叫農/肝、大喜利應該點譯)，有興趣可以睇返。
好喇入正題，話說呢排香港再次興起追本地明星熱潮，阿唯都因為睇《全民造星 IV》而再次成為追星一族。雖然10年前自己有追AKB48嘅經驗，不過隨住時代變遷，網上面好多追星專用潮語，對我來講都好陌生，要花啲時間摸索，先明白而家嘅後生仔到底講緊乜。
下面列出嘅字，都係一啲比較新嘅香港追星潮語，當中夾雜咗中、日、韓追星用語，又或者係廣東話簡稱，平時無追開星嘅，應該會睇到一頭霧水。不妨睇吓自己識得幾多？
【世一/宇一】
全寫︰世界第一、宇宙第一
意思︰「世一」呢兩隻字，應該係網絡上最常見嘅追星用語之一。個語感有啲似讚對方係「number 1」，但更加有一種「你係全球最勁」嘅氣勢喺度。至於「宇一」就係再誇張啲嘅版本，但就無世一咁普及。
用法︰有時為咗支持偶像，但又諗唔到寫乜，就會留言話「(偶像名)世一」，幫手增加個post嘅reach，或者出post時直接用嚟做Hashtag。
【心一】
全寫︰心中第一
意思︰心一雖然同世一個寫法相近，亦都係支持偶像嘅術語，但語意唔係完全一樣。世一純粹作誇獎用，但心一就牽涉個人內心感受，代表就算偶像遇到咩事，有咩表現，內心嘅首席地位都唔會動搖。
用法︰同世一類似，但假如想強調偶像團入面嘅某人先係最愛，或者遇到挫折之類，呢個時候唔適合用世一，就可以用心一代替。
【偶包】
全寫︰偶像包袱
意思︰當一個偶像無論台上台下，都維持住佢嘅明星Style，唔會輕易展示失態一面，就叫做有偶包，相反果啲可以玩到好癲，經常狂態/醜態盡露都唔介意嘅藝人，就會被形容為零偶包。
用法︰當偶像咩特殊情況下都唔會輕易失態，可以話佢有偶包。有啲特別擅長玩綜藝類節目嘅(例如Edan)，就可以用「無偶包」嚟讚佢肯放低偶像包袱，為節目效果豁出去。
