《ERROR自肥企画》最後一集實在太精彩，各路高手從娛樂、藝術、商業、政治，甚至哲學角度去分析，真係睇極都睇唔晒！不過畀我搵到個Point無乜人留意，就等我用宅人嘅角度簡單講兩句啦。
我諗好多觀眾都係抱住依依不捨嘅心情去睇片尾，到roller差唔多完結時，打開會議室房門，突然見到著住Rick and Morty T恤嘅Mike導有嘢講，呢個片尾彩蛋都幾震撼。可能因為咁，好多人就錯過咗「特別鳴謝 觀眾」呢幾隻字。
呢幾個字有乜咁特別？你諗吓喎，平時睇戲睇電視劇，又或者任何類型嘅影視節目，啲roller都係用嚟寫低有咩工作人員，或者sponsor名之類。無論係電視觀眾定係現場觀眾，本身都無參與過節目製作，所以理應唔會受到鳴謝。
不過對於打開機(仲要打得叻)嘅人來講，應該唔會對呢句嘢陌生。因為每當打爆機，有啲遊戲就會喺roller最後，向玩家致謝。方式有好多，可以係寫一句「Thanks for playing」或者「Thank you for playing」，喺Special thanks多謝完所有人之後，補一句「...and you!」。又例如我剛剛爆咗Mario Galaxy，製作人員就借Mario把聲，喺出完roller後，講咗句「Thank you so much for playing my game」多謝我。
明明遊戲玩家唔係工作人員，點解要喺Roller位被多謝？我覺得係因為全靠玩家買咗隻game，付出精神、時間同努力打爆佢，先可以睇到爆機畫面，見到Staff list。遊戲製作人員覺得自己嘅心血無白費到，好自然就想借個位多謝玩家嘅付出。呢種向受眾致謝嘅互動形式，除咗舞台劇謝幕之外，喺其他流行文化媒體並唔常見。
好喇，返翻去《自肥》，Mike導喺roller特別鳴謝觀眾，有啲咩意思呢？好明顯Mike導同埋成個無制限OT編集団，都視《自肥》為一個同觀眾互動嘅過程，而唔係好似一般節目(例如花姐ERROR遊)咁單向輸出，娛樂完觀眾就算。喺最後一集其中一幕，甚至剪咗好多連登仔女嘅comment落去添。
我亦知道Mike導同193，都有mon住連登、facebook之類睇觀眾嘅feedback，佢地會即時知道有咩環節係特別受觀眾歡迎。至於佢地會點樣因應留言而調整節目方向呢，就要等記者遲啲問吓佢地喇。
