之前分享過喺香港搞樓宇按揭嘅心得，例如H按P按有咩唔同、搵中介幫手嘅好處，同埋點樣賺盡按揭回贈等等。如果未睇過可以喺呢度重溫返︰
終於嚟到(最唔想面對嘅)供樓日，喺度就同大家分享吓一啲供過樓先知嘅重要資訊啦。
．幾時先開始供樓？
首先要知道你個單位嘅成交日係幾時。就我自己經驗而言，上律師樓畀晒尾數&簽完正式買賣合約後，律師樓會講你知邊日係正式成交日。例如我7月4日上去律師樓，7月11日就係正式成交日，可以上去拎返一份手續完成通知信。
我開頭都以為踏入成交日當日，就要開始供樓，原來並唔係咁！銀行會喺成交日後一個月後先開始扣數，用返頭先嘅例子，7月11日係成交日，8月11日就開始第一期供款。
．供樓筆錢要擺去邊？
因為個人銀行戶口，通常都有儲蓄同往來(支票)兩個類別，咁到底供樓筆錢應該放邊度先啱呢？原來間間銀行嘅規定都唔同。我用滙豐，只需要放喺儲蓄戶口就得，但聽講有啲銀行需要放喺往來戶口。所以最好事前同銀行職員確認清楚呢點，咁就可以確保唔會出錯。
．供樓信係點嘅樣？
由於有太多私隱，我就唔貼出來了，但可以喺度描述吓封信係點嘅。
基本上過咗成交日之後，銀行就會寄信畀你。呢封信正式名稱叫「還款表」，裡面會提到你尚欠嘅本金有幾多、還款週期、下次供款日期、年利率、每期供款金額等等嘅資訊。由於而家處於加息周期，所以呢個年利率隨時每個月都有唔同，咁當然會影響到每期嘅供款金額啦。
另外封信下面會列晒每期要供嘅利息同本金分別有幾多，同埋供完之後尚欠金額。如果供款期長，未必會列晒出嚟，滙豐就用兩版紙，密麻麻咁列咗100期出嚟。
如果唔想收實體信，其實可以申請電子通知書，呢樣可能就要同銀行方面申請返喇。
．Mortgage-Link點著數法？
相信做過按揭嘅都有聽過「高息存款掛鈎戶口」呢樣嘢，英文就叫Mortgage-Link。舉個例，我而家呢一刻用緊3.375%息口供樓，咁銀行都會同時將我嘅存款戶口Upgrade做3.375%年息。
你可能會諗，而家做定期都閒閒地都4厘，好似無乜吸引，但呢個優惠勁在唔係定期，係活期啊！即係話我放筆錢喺度，乜都唔駛做就有高息，仲可以隨時拎走，啱晒入伙期需要成日用大錢嘅業主。
Mortgage-Link聽落好似幾著數，咁但係銀行借錢畀你嘅息同你存款嘅息一樣嘅話，咁銀行賺乜呢？再極端啲，我借500萬但存1000萬落銀行，咁銀行咪要倒蝕？咁呢層你又唔駛同銀行擔心，佢地當然係計過數啦。通常個做法係最高存款額只係借貸額嘅一半，即係借500萬，只有頭250萬享有高息，之後存入去嘅錢就無高息喇。
．Mortgage-Link利息幾時開始計？
關於呢個疑問，我都google過好多次，但都搵唔到答案。試吓問返中介公司，佢話要正式開始供樓後，Mortgage-Link先生效，但實測過先發現係錯嘅！
正確答案係，物業正式成交之後，Mortgage-Link戶口就已經開始計高息喇！所以記得把握資金最充裕嘅頭一個月時間，賺息賺到盡。不過呢個僅限於滙豐嘅情況，如果係用其他銀行，最好先同相關職員確認一下。
關於按揭嘅知識應該差唔多講晒喇，如無意外應該係最後一篇文，喺呢度祝大家供樓順順利利！
